يعني إيه تقاطع؟
بتحط على الشارت متوسطين متحركين، واحد قصير وواحد طويل. الشائع إن القصير متوسط 50 جلسة والطويل متوسط 200 جلسة، بس ممكن تشوف أزواج تانية. لما القصير يطلع فوق الطويل اسمها «تقاطع ذهبي» (Golden Cross). ولما القصير ينزل تحت الطويل اسمها «تقاطع الموت» (Death Cross).
التقاطع الذهبي بيوصف إن متوسط الأسعار في الفترة الأخيرة بقى أعلى من متوسطها في الفترة الطويلة. وتقاطع الموت بيوصف العكس. هو وصف لحركة حصلت خلاص، مش إعلان عن حركة جاية.
ليه التقاطع بييجي متأخر؟
متوسط 200 جلسة فيه أسعار من أكتر من 9 شهور. عشان يتحرك محتاج أسعار جديدة كتير تغير المتوسط. ولحد ما القصير يلحقه، يكون السعر نفسه اتحرك مسافة كبيرة.
لما السوق يمشي عرضي
لو السعر بيتحرك في نطاق ضيق من غير اتجاه واضح، المتوسطين بيقربوا من بعض ويفضلوا يتقاطعوا رايح جاي. ساعتها ممكن تشوف تقاطع ذهبي وبعده بكام أسبوع تقاطع موت، والاتنين ما وصفوش أي اتجاه حقيقي.
شوف المتوسطات على شارت
افتح أي سهم في فوده لينس، وشغّل متوسطين بفترتين مختلفتين، ودور على آخر مرة اتقاطعوا فيها. قارن سعر التقاطع بأقرب قاع أو قمة قبله.
اختبر نفسك
1. متوسط 50 نزل تحت متوسط 200. ده اسمه إيه؟
2. قاع السهم 5 جنيه، والتقاطع الذهبي حصل عند 6. السعر كان طالع كام من القاع؟
الخلاصة
- التقاطع الذهبي: المتوسط القصير يطلع فوق الطويل. وتقاطع الموت: العكس.
- التقاطع دايماً بييجي بعد ما السعر اتحرك، لأن المتوسط الطويل بطيء بطبيعته.
- في السوق العرضي التقاطعات بتكتر وما بتوصفش اتجاه حقيقي.