يعني إيه إطار زمني؟
الإطار الزمني هو المدة اللي بتمثلها الشمعة الواحدة على الشارت. في الشارت اليومي، كل شمعة جلسة. في الأسبوعي، كل شمعة أسبوع تداول، وفي الأسبوع العادي في البورصة المصرية ده 5 جلسات من الأحد للخميس. وفي الشهري، كل شمعة شهر كامل.
الشمعة الأسبوعية مش حاجة جديدة، هي تلخيص للجلسات اليومية بتاعة الأسبوع. وبنفس الطريقة الشهرية بتلخص جلسات الشهر.
نفس السهم على 3 أطر
بص على السهم المتخيل ده على التلات أطر. على اليومي، السهم وصل 21 وبعدها نزل لحوالي 19.5 في آخر 6 جلسات. على الأسبوعي، السهم طالع على مدار 9 أسابيع وآخر أسبوع بس أحمر. على الشهري، السهم ماشي لفوق من 8 شهور تقريباً من غير توقف كبير.
مين فيهم صح؟ التلاتة. اليومي بيقولك إيه اللي حصل الأسبوعين اللي فاتوا، والشهري بيقولك إيه اللي حصل السنة اللي فاتت. اللي يفرق هو المدة اللي انت بتفكر فيها. لو بتفكر في أيام، اليومي أقرب لسؤالك. ولو بتفكر في شهور وسنين، الأسبوعي والشهري بيوروك الصورة من غير دوشة الجلسات.
غيّر مدة الشارت
في الشارت اليومي لأي سهم في فوده لينس تقدر تختار تشوف من 30 يوم لحد سنة. قارن شكل نفس السهم على 30 يوم وعلى سنة.
اختبر نفسك
1. أسبوع فتح على 8.00 وقفل على 7.60، وأعلى سعر فيه 8.30 وأقل سعر 7.50. لون الشمعة الأسبوعية إيه؟
2. سهم نازل على اليومي وطالع على الشهري. ده معناه إيه؟
الخلاصة
- الإطار الزمني هو المدة اللي بتمثلها الشمعة: جلسة أو أسبوع أو شهر.
- الشمعة الأسبوعية بتاخد افتتاح أول جلسة وإغلاق آخر جلسة وأعلى وأقل سعر في الأسبوع.
- اختار الإطار حسب المدة اللي بتفكر فيها، واعرف إن آخر شمعة ممكن تكون لسه بتتكون.